Kiko ta strès post troumátiko PTSS?
PTSS ta un kondishon mental ku ta desaroyá su mes despues di un insidente troumátiko. E persona ku ta sufri di PTSS tin pensamentunan konstante di e insidente, angustia/ansiedat rekurente i rekuerdonan di loke a sosodé.
Ehèmpel di insidente troumátiko: aksidente di outo, agreshon físiko o seksual, violensia doméstiko, insesto, suisidio, kandela.
PTSS por tin konsekuensianan hopi grave pa e persona i su medio social. Pa e motibu aki ta importante pa buska yudansa profeshonal si e síntomanan no disminuí i disparsé ku tempu.
Afortunadamente PTSS ta un kondishon ku por wòrdu tratá.
PTSD ta karakterisá den kuater grupo di síntoma:
1. Sintimentunan di tenshon i inkietut ku no tabata presente promé ku e suseso troumátiko.
E sintimentunan aki ta enserá rabia, agresividat o iritashon, falta di soño, problemanan di konsentrashon, tene hopi kuidou di forma eksesivo i reakshonan violento.
2. Rebibá e suseso troumátiko.
Esaki ta sosodé no solamente durante pesadia na soño pero tambe den dia.
3. Evitá kualke kos ku ta asosiá ku e suseso troumátiko.
E persona ta evitá di tur forma posibel tur tipo di akshon relashoná o ku ta rekordé e suseso troumátiko.
4. Síntomanan di apatia.
Esaki ta manifestá su mes dor di un falta di interes den aktividatnan normal di tur dia di e persona personanan den su entorno i pa ku futuro. E síntomanan aki ta parse un depreshon.
E akohida, apoyo i rekonosementu di parti di e personanan serkano ta generá un sintimentu di kalma serka e persona ku pasa den un suseso troumátiko i por redusí e posibilidat pa sufri di PTSD.
Na ki momentu mester tuma un tratamentu despues di pasa den un insidente troumátiko?
Tratamentu ta nesesario si despues di un insidente troumátiko e persona su emoshonan ta keda “pegá” o si ta eksistí kehonan di tenshon i falta di soño. Tratamentu tambe ta nesesario si pa e persona na momentu ku ta imposibel pa e papia tokante su trouma. Si e persona no por papia tokante su trouma ta krusial pa aktua paso sino e konsekuensianan por ta grave pa e i personanan den su entorno.
Tratamentu di PTSS tin bon resultado. Buska yudansa si bo tin mester i no sinti berguensa!
