Kiko ta Schizophrenia?
Schizophrenia ta un malesa serio ku por ta difísil pa ser tratá.
Schizophrenia ta un trastorno serio ku ta afektá kon un persona ta pensa, sinti i aktua. Un persona ku tin schizophrenia por tin difikultat pa distinguí entre kiko ta real i kiko ta su imaginashon. E persona por sinti su mes straño i tin difikultat pa ekspresá su emoshon di un forma normal den un situashon sosial.
Kontrario na lo ke hopi hende ta kere schizophrenia no ta personalidat dividí. Mayoria di persona ku schizophrenia no ta violento òf ta kousa peliger pa otro persona. E kousa di schizophrenia no ta eksperensianan di infansia, falta di edukashon korekto òf falta di forsa di boluntat. E síntomanan ta diferente pa kada persona.
Kiko ta e kousa di schizophrenia ?
Siensia no tin klaridat kiko ta e kousa eksakto ainda. Algun teoria riba e kousa ta indiká ku e kousa por ta sierto malesa inkluyendo: Genétiko hereditario, biológiko (desbalanse den sierto kímika den serebro), infekshonnan viral trastorno den e sistema inmunológiko.
Síntoma di schizophrenia
- Tende óf mira kosnan ku no ta bèrdat.
- Un sintimentu konstante ku bo ta wòrdu opservá.
- Papia di un forma straño i sin sentido .
- Kapasidat di studio i trabou ta bai atras.
- Kambionan drástiko den aparensia i higiene.
- Kambio di personalidat.
- No tuma parti na aktividatnan sosial.
- Komportashon inadekuá o straño
- Inkapasidat pa drumi o konsentrá
Tratamentu di schizophrenia:
Pa trata schizophrenia ta hasi uso di remedi anti-sikótiko. E remedi ta funshoná di tal manera ku e ta yuda blòkia e vianan kímiko den serebro ku ta kousa síntomanan serka e pashènt. Den sierto kaso ta nesesario purba diferente remedi anti-sikótiko pa haña esun ku ta mas mihó pa kada individuo.
